亞視復活:圍爐取暖的極致

“亞視會,永遠都存在,有新買家,成日嚇大家……”(惡搞改編歌《亞視永恆》)

2015年不獲續牌的亞洲電視,於2016年4月2日凌晨零時牌照期屆滿“熄機”正式結束58年309天的電視廣播歷史。其兩條模擬頻道由香港電台接手,每日播放比亞視更慘不忍睹的節目。

看電視長大的朋友,對亞視的感情是複雜的,可謂又愛又恨。《我和殭屍有個約會》、《百萬富翁》、《今日睇真啲》等經典劇集和綜藝節目,是不少人的集體回億。但自從亞視經歷多次“易主”,製作質素每況愈下,直播六合彩攪珠破天荒出錯、報錯國家領導人死訊,“死唔斷氣”不斷重播舊節目,都十分惹人反感。

正當大家淡忘亞視之際,亞視竟宣佈“鹹魚翻生”,以OTT廣播形式復活,又有新App上架,日前還在大埔亞視總台舉行《ATV亞洲電視啓播典禮》,邀得近千嘉賓及藝人包括徐小明夫婦、蕭定一、蔡和平、朱慧珊、夏春秋、何守信、邱達昌、郭少明夫婦、林建岳、張永霖、盧慶輝及梁思浩等出席,曾華倩、陳彥行及朱慧敏更低胸撐場,並有林子祥、蘇永康、任賢齊獻唱助興,場面熱鬧。

亞視新App上架,更登上免費App排行榜首位。

啓播禮上,由林子祥打響頭炮獻唱。阿Lam唱歌一向落力,不過落力得濟用氣過度。大家都期待之後有更勁爆的節目,結果見到金牌司儀何守信等一班人圍威喂講當年,講講下仲講埋隔離台的《歡樂今宵》,真係“滿頭黑人問號”。

阿Lam做表演嘉賓,打頭炮演出。
何守信等一班人圍威喂講當年,講講下仲講埋隔離台的《歡樂今宵》,真係“滿頭黑人問號”。

過往亞視的大型節目,都出現過不少“經典”場面,例如球星岩布仙尼在亞視台慶騷上唱出“Happy Birthday to me”。今次嘉賓蘇永康亦有“貢獻”,當蘇永康獻唱完《男人不該讓女人流淚》及《那誰》後,司儀介紹他和ATV有何淵源,原來蘇永康曾參與亞視劇集《法網群英》,司儀之一的王喜表示:“佢(指蘇永康)有個承諾喇喎,會幫我哋,參與下我吔嘅製作。”蘇永康就驚訝語氣反問:“開……開劇架你哋?”令主持人皆愕然,被考起的王喜隨即緩和氣氛:“開架,你點知唔開架,never say never。”蘇永康就打圓場,表示最緊要有好劇本,而王喜亦拍心口表示“我嚟寫。”

蘇永康爆金句:“開……開劇架你哋?”

最有創意的環節,就係由李麗蕊、梁思浩同陳彥行跳“卸膊操”,他們突然出場唸口訣,但明顯冇跟返個beat,覺得啱位就入,講“我淨係想專注喺事業”、“我哋只不過喺度gathering㗎啫”,佢哋跳得好開心,觀眾睇到好尷尬。如果大家想考驗自己忍耐力,不妨搵來重溫下。

最有創意的環節,莫過於由李麗蕊、梁思浩和陳彥行跳“卸膊操”,令觀眾睇到好尷尬。

最後想講吓由亞視在今年推出的新版《百萬富翁》。新版《百萬富翁》和舊版形式冇乜分別,只是節目主持由陳啟泰變成陳志雲,第一集嘉賓就有崔碧珈、朱慧敏、王賢誌、何守信和林作,而林作同拍擋崔碧珈更重演當年《百萬富翁》中最經典一幕……

講起《百萬富翁》,就不能不提陳芷菁。話說佢當年同鄧光榮參演明星版既《百萬富翁》,答到六萬元既問題,而個條問題係“以下邊一部不是、不是莎士比亞嘅四大悲劇之一?”。陳芷菁聽罷信心爆棚,就肯定選擇B《奧賽羅》係正確答案,仲理直氣壯講咗句:“我讀drama架!”,坐係旁邊既鄧光榮亦可能因為咁所以跟從陳芷菁既決定,仲舉起手話:“拍定手先!”點知原來陳芷菁係答錯,而呢個片段亦成為“陳芷菁式悲劇”,並流傳至今……

陳芷菁理直氣壯講咗句:“我讀drama架!”,點知答錯咗。

正所謂“人類總是重複同樣的錯誤”,在新版《百萬富翁》,林作就重演咗呢幕“陳芷菁式悲劇”!林作伙拍崔碧珈參與比賽,答到六千蚊關口時題目為“哪一年英國公投決定脫離歐盟展開分手費談判”……

林作伙拍崔碧珈參與比賽

崔碧珈睇到題目後一面茫然。

林作:呢層我地攬下先啦不如!

崔碧珈:點解呢?

林作:因為呢條我識答!

崔碧珈:你肯定?!

林作最後選擇左D. 2017,但答案其實係C. 2016……

林作選錯答案

主持陳志雲訪問時表示林作表現令佢好失望,講完仲同何守信一齊恥笑作作;而當事人林作就表示拍檔崔碧珈令佢分神,搞到自己無法專心答問題,仲話為咗愛情可以連100萬都放棄添!

林作話為咗愛情,可以連100萬都放棄!

 

作者
娛家

一年三百多日都在拼命奮鬥的傳媒工作者。從小撈電視汁食飯,喜歡深夜聽電台,曾想過當DJ,長大後卻變成了網台花生友,愛聽八卦是非,也愛和讀者分享見聞和感受。